बुटवल । गैंडाको खाग तस्करले प्रहरीको पेस्तोल खोसेर गोली चलाउँदा एक जना घाइते भएका छन् । घाइते भएका राकेश न्यौपाने तस्करकै साथी हुन् ।

घाइतेको अहिले भैरहवा मेडिकल कलेजमा उपचार भैरहेको जिल्ला प्रहरी कार्यालयका डीएसपी प्रवक्ता सत्यनारायण थापाले बताए ।

उनले भने, ‘घाइते न्याैपानेकाे गाला र कुममा गोली लागेको छ ।’

बुटवल नगरपालिका–८ मा रहेको न्यू कलश होटलमा खाग तस्कर र प्रहरीबीच मुडभेट हुँदा गोली चलेको थियो ।
होटलमा खाग तस्कर बसेको सुचना पाएपछि प्रहरीले खानतलासी गरेको उनले बताए ।

खानतलासी गर्ने क्रममा होटलको १०५ नम्बर कोठामा खाग रहेको पक्का भएपछि तस्करलाई कोठामा थुनेर सिभिल ड्रेसमा खटिएका प्रहरीले थप मद्दतका लागि कार्यालयमा खबर गरेका थिए ।

सोही क्रममा चार जना तस्कर ढोका फुटाएर निस्किएको र प्रहरीले रोक्न खोज्दा पेस्तोल खोसेर फायर गरेको प्रवक्ता थापाले बताए ।

प्रहरीलाई भनेर हानेका गोली लाग्दा न्यौपाने घाइते भएका हुन् ।

तस्कर भक्तबहादुर थापा र कर्णबहादुर राउतलाई प्रहरीले नियन्त्रणमा लिएको छ । अर्का एक जना फरार रहेको प्रहरी कार्यालय रुपन्देहीले जनाएको छ ।

घटनाबारे थप अनुसन्धार र फरारको खोजी भइरहेको प्रवक्ता थापाले बताए ।