काठमाडौं, २९ चैत । नेपाल पशुपन्छी औषधि व्यवसायी संघ वागमती जिल्ला शाखाले नुवाकोटको कुमलटारका विपन्न परिवारलाई कुखुराको चल्ला वितरण गरेको छ। संघले आफ्नो सामाजिक उत्तरदायित्व कार्यक्रमअन्तर्गत नुवाकोटको विदुर नगरपालिका वडा नं. ३ कुमलटारका ३१ परिवारलाई १०/१० वटाका दरले कुखुराका चल्ला वितरण गरेको हो ।

संघका अध्यक्ष रमेश अधिकारीका अनुसार, अपाङ्गता भएका तथा विपन्न परिवारलाई वडा अध्यक्ष  बद्री प्रसाद रिमालको रोहवरमा संघको कार्यसमितिले चल्ला वितरण गरेको हो । “हामीले सामाजिक उत्तरदायित्वअन्तर्गत यो कार्यक्रम सञ्चालन गरेका हौँ। यसले स्थानीयको जीवनयापनमा केही भए पनि सहयोग पुग्ने विश्वास लिएका छौँ,” अधिकारीले भने ।

सामाजिक उत्तरदायित्वअन्तर्गत सञ्चालित कार्यक्रममा कुखुराका चल्लासँगै २ किलो दाना तथा औषधि पनि निःशुल्क वितरण गरिएको थियो। हुर्किँदै गरेका चल्ला वितरण गरिएकोले किसानहरूले छिट्टै राहत पाउने विश्वास संघले व्यक्त गरेको छ। “हुर्किई सकेका चल्ला भएको कारणले किसानले चाडै राहत मिल्ने आशा गरेका छौँ,” अधिकारीले थपे ।

वडा अध्यक्ष बद्री प्रसाद रिमालले संघले गरेको सहयोगले स्थानीयलाई ठूलो राहत मिलेको बताए । उनले भने, “यस्तो सहयोगले विपन्न परिवारलाई आर्थिक रूपमा सबल बनाउन मद्दत गर्छ ।” संघले गरेको यो कार्यले स्थानीय स्तरमा सकारात्मक प्रभाव पार्ने विश्वास लिइएको छ ।