नेपालमा पशु चिकित्सकहरूको संख्या २,०९६ पुग्यो
काठमाडौं| नेपालमा बाइसौँ नाम दर्ता परीक्षा सम्पन्न भएपछि नेपाल पशु चिकित्सा परिषद्का अनुसार दर्तावाल पशु चिकित्सकहरूको संख्या २,०९६ पुगेको छ। परिषद्ले अद्यावधिक गरिएको स्थायी ठेगानाको आधारमा प्रदेशगत तथ्याङ्क सार्वजनिक गरेको छ।
हाल कोशी प्रदेशमा १६३ जना, मधेश प्रदेशमा ३८७ जना, बागमती प्रदेशमा ६४४ जना, गण्डकी प्रदेशमा ३१० जना, लुम्बिनी प्रदेशमा ३९० जना, कर्णाली प्रदेशमा ८० जना र सुदूरपश्चिम प्रदेशमा १२२ जना पशु चिकित्सक रहेका छन्।
लैंगिक हिसाबले हेर्दा ५०० जना महिला (२३.९२%) र १,५९६ जना पुरुष (७६.०८%) रहेका छन्।
हालै सम्पन्न बाइसौँ नाम दर्ता परीक्षामा २६ जिल्लाबाट जम्मा ४७ जना परीक्षार्थी उत्तीर्ण भएका छन्, जसमा ३७ जना पुरुष र १० जना महिला छन्। नेपालमा पशु चिकित्सा क्षेत्रको दायरा विस्तार भएसँगै दर्तावाल पशु चिकित्सकहरूको संख्या पनि बढ्दै गएको छ, जसले पशु स्वास्थ्य तथा जनस्वास्थ्य सुरक्षामा सकारात्मक प्रभाव पार्ने विज्ञहरूको भनाइ छ।
