काठमाडौँ ।ललितपुरको जावलाखेलस्थित सदर चिडियाखानामा रहेका जीवजन्तुहरूमा बर्ड फ्लुको संक्रमण पुष्टि भएपछि चिडियाखाना अनिश्चितकालका लागि बन्द गरिएको छ।

राष्ट्रिय प्रकृति संरक्षण कोष–सदर चिडियाखानाले आज एक सूचना जारी गर्दै आम सर्वसाधारण र दर्शकहरूको स्वास्थ्यलाई मध्यनजर गरेर चिडियाखाना बन्द गर्ने निर्णय गरेको हो।

जारी सूचना अनुसार, २०८३ साल आषाढ ५ गतेदेखि लागू हुने गरी अर्को सूचना प्रकाशित नभएसम्मका लागि चिडियाखाना पूर्ण रूपमा बन्द रहनेछ। चिडियाखाना प्रशासनले यस निर्णयबाट दर्शकहरूमा पर्न गएको असुविधाप्रति क्षमाप्रार्थी प्रकट गरेको छ।

संक्रमण नियन्त्रण र जीवजन्तुहरूको उपचारका लागि आवश्यक कदमहरू चालिरहेको बुझिएको छ।