नेपाल पशुपन्छी औषधि व्यवसायी संघको १४औं महाधिवेशनमा आयाततर्फको उपाध्यक्षमा सुना सुवेदीले उम्मेदवारी दिएकी छन् । कान्तिपुर भेट डिष्ट्रिब्युटर्स प्रालिमार्फत पशुपन्छी औषधि व्यवसायीमा सक्रिय सुवेदीसँग संघको कोषाध्यक्षको भूमिका निर्वाह गरिसकेको अनुभव छ । व्यावसायिक संगठनमा राजनीतिक रङ मिसाउन नहुने मत राख्ने सुवेदी आफ्नो जित लगभग सुनिश्चित भएको दाबी गर्छिन् । संघको १४औं महाधिवेशनको छेकोमा उनको उम्मेदवारी, भावी योजनालगायत विषयमा केन्द्रित रहेर भेट टाइम्सले गरेको कुराकानी :

संघको आयाततर्फको उपाध्यक्ष पदमा किन उम्मेदवारी दिनु भएको हो ?
व्यावसायिक हकहित र व्यवसायलाई प्रवद्र्धन गर्न तथा व्यवसायीका सम्पूर्ण समस्यालाई आफनै बुझेर त्यसको समाधान गर्न संघको आयाततर्फको उपाध्यक्षमा मैले उम्मेदवारी दिएको हुँ । साथै यसपछि मेरो लक्ष्य भनेको कार्यकारी नेतृत्वमा आफ्नो क्षमता देखाउने पनि हो ।

तपाईंले उम्मेदवारी दिँदा साथीहरूको प्रतिक्रिया के पाउनु भएको छ ?
मैले उम्मेदवारी घोषणा गरेपछि देशैभरका साथीहरूबाट हौसला र शुभकामना पाइरहेको छु । कान्तिपुर भेट डिस्ष्ट्रिब्युटर को नेतृत्वलाई सम्हाल्दै औषधि व्यवसाय र समाजसेवा गर्दै आइरहेको हुँ ।

जितिएला त चुनाव ?
मैले आयाततर्फको उपाध्यक्षमा उम्मेदवारी दिएको हुँ । सबै साथीहरूसँग सरसल्लाह गरेर नै उम्मेदवारी दिएको हुँ । चुनाव जित्दिनँ भन्ने प्रश्नै आउँदैन । मेरा प्रतिद्वन्द्वीले पनि अन्त्यमा मलाई नै सहयोग गर्नुहुनेछ ।

तपाईंलाई व्यवसायीले मतचाहिँ किन दिने ?
आयात, खुद्रा र थोकतर्फका सबै व्यवसायीहरूको समस्याका लागि म तत्पर रहन्छु । सबैलाई थाहा छ, कान्तिपुर भेट डिस्ष्ट्रिब्युटरबाट व्यवसायीले कस्तो र कसरी सहयोग पाइरहेका छन् । म कार्यकारी पदमा नरहे पनि सबै समस्याको समाधान सहज तरिकाले गरिरहेका छौं । व्यवसायीहरूको सेवा गर्नु नै मेरो सौभाग्य हो । व्यवसायीका हरेक प्रकारका समस्यामा साथ दिनका लागि नै मेरो उम्मेदवारी हो ।

व्यवसायीले अहिले झेलिरहेका समस्यालाई कसरी हेर्नुभएको छ ?
्व्यवसायीले अहिले झेलिरहेका समस्याहरूलाई मैले आफनै मानेको छु । समस्या नभएको व्यापार नै हुँदैन । तमाम समस्या समाधान गर्न मसँग रोडम्याप पनि छ । नेतृत्वबाट पनि यो यो काम गराउन सक्ने नेतृत्वदायी क्षमता ममा छ । व्यवसायीका सबै समस्या मलाई थाहा छ र कसरी समाधान गर्ने योजना पनि छ ।

व्यवसायीका समस्या समाधानमा तपाईंका रोडम्याप के हुन् ?
व्यवसायीका साझा समस्या छन् र त्यसलाई सामूहिक रूपमा हल गरिनु पर्छ भन्ने मेरो मान्यता हो । यसका लागि हामीबीच एकता र सहकार्यको खाँचो छ । मेरो रोडम्याप मेरो व्यक्तिगत होइन, सबै व्यवसायीको साझा हो । त्यसैले व्यावसायिक एकता पनि मेरो रोडम्याप हो ।

नेता बन्न चुनावमा उठ्ने तर पछि व्यवसायीका समस्यालाई फर्केर पनि नहेर्ने प्रवृत्ति बढेको गुनासो व्यवसायीहरूको छ । के भन्नुहुन्छ ?
नेता बन्न चुनावमा उठ्ने र चुनाव जितेपछि व्यवसायीको समस्यालाई टुलुक्क नहेर्ने तपाईंको भनाइसँग म सहमत छु । चुनाव आएपछि उठौं उठौं लाग्नु स्वाभाविक पनि हो । कोषाध्यक्षको कार्यकालमा मैले कसरी काम गरेँ ? त्यसको मूल्यांकन साथीहरूले गरेकै होलान् । अध्यक्ष, उपाध्यक्ष र सम्पूर्ण पदाधिकारीहरूले संघलाई एक ढिक्का बनाएर लगेका हौं । हामीबीच कहिले पनि मनमुटाव भएको छैन । चुनावपछि व्यवसायीको काँधमा काँध मिलाएर काम गर्न तयार छु । व्यवसायीका गुनासो आउन नदिन मेरो प्रयास रहन्छ ।

व्यावसायिक संगठनमा राजनीतिक घुस्यो भन्ने व्यवसायीमा चिन्ता देखिन्छ, यसबारे तपाईंको भनाइ के छ ?
यस्ता संगठनमा राजनीति घुस्नु गम्भीर कुरा हो । किनभने, कुनै पनि व्यावासायिक संगठनमा राजनीति घुसाउनु हुँदैन । हामीले राजनीति विचारभन्दा पनि व्यवयासीको हितलाई ध्यानमा राखेर मतदान गर्ने हो । यो संघ व्यावसायिक हकहितका लागि हो, पार्टीको विचार र झण्डा बोक्नका लागि होइन । संघमा राजनीति गर्नेलाई हामी सबैले चिनेका छौं । संघमा राजनीति घुसाएर व्यवसायीलाई राजनीतिक रंग दिएर फुटाउने काम गलत हो । त्यसैले संघको हितमा काम गर्ने क्षमतावान् व्यक्तिलाई निर्वाचित गराउनुपर्छ । ‘यो मेरो’, ‘त्यो तिम्रो पार्टी’ भन्नु हुँदैन । क्षमता र योगदानका आधारमा नेतृत्व चयन हुनुपर्छ ।

सहमतिका आधारमा नेतृत्व चयन गर्ने सम्भावना कति छ र सहमतिका लागि तपाईं तयार हुनुहुन्छ कि हुनुहुन्न ?
महाधिवेशनमा सहमतिका आधारमा पनि नेतृत्व चयन हुन सक्छ । पूर्वअध्यक्ष र पूर्वपदाधिकारीहरूले सहमतिका लागि प्रयास गर्नुहुनेछ । तर निर्वाचन पनि प्रजातान्त्रिक प्रक्रिया हो । त्यसैले मतदान नै भयो भने त्यो पनि अन्यथा हुँदैन । तर पनि सहमति हुनु सबैभन्दा राम्रो हो । यदि सहमति भएन भने त्यसको विकल्प मतदान नै हो । आफनो क्षमता देखाउनेलाई महाधिवेशन प्रतिनिधिले मतदान गर्नेछन् । सबै साथीहरू विवेकशील छन् र मतदानमा स्वविवेश प्रयोग गर्नु हुनेछ भन्ने विश्वास छ ।