पशु सेवा विभागका महानिर्देशक डा. उमेश दाहालको बिदाइ, कार्यकालका उपलब्धिहरू सार्वजनिक
काठमाडौं । पशु सेवा विभागका महानिर्देशक डा. उमेश दाहालको बिदाइ समारोह आज विभागको सभाहलमा सम्पन्न भएको छ। समारोहमा उपमहानिर्देशक डा. लेखराज दाहाल र डा. सुलोचना श्रेष्ठले दोसल्ला ओढाएर बिदाइ गरेका थिए।
डा. दाहाल १८ महिनासम्म पशु सेवा विभागको नेतृत्व गर्दै अब मधेश प्रदेश सरकारको मुख्य मन्त्री कार्यालय मातहत सरुवा भएका छन्। उनलाई प्रदेश मन्त्रिपरिषद्को आगामी बिहीबार बस्ने बैठकले भूमि व्यवस्था, कृषि तथा सहकारी मन्त्रालयको प्रदेश सचिवका रूपमा जिम्मेवारी तोक्ने छ, जसअनुसार उनले शुक्रबारबाट सो पद सम्हाल्नेछन्।
बिदाइ समारोहमा डा. दाहालले विभागमा नयाँ जिम्मेवारी सम्हाल्न आएका सहसचिवहरू डा. चन्द्र ढकाल, डा. सञ्जयकुमार यादव, र शंकर साहलाई स्वागत गरेका थिए। साथै, विभागका कर्मचारी सिताराम वली र डा. इन्दिरा शर्मालाई पनि विभागमा स्वागत गरिएको थियो।
समारोहमा डा. दाहालले आफ्नो कार्यकालमा भएका उपलब्धिहरूको चर्चा गर्दै समग्र पशुजन्य उत्पादन वृद्धिको विवरण प्रस्तुत गरे। उनका अनुसार दूध उत्पादन वार्षिक २६ लाख १४ हजार मेट्रिक टन पुगेको छ, जसअनुसार प्रत्येक नेपालीलाई प्रतिवर्ष ९० लिटर दूध उपलब्ध भइरहेको छ।
माछा उत्पादन १ लाख १५ हजार मेट्रिक टन पुगेको छ, जसबाट ८५–९०% आत्मनिर्भरता हासिल भएको छ, भने आगामी एक वर्षभित्र पूर्ण आत्मनिर्भर बन्ने लक्ष्य राखिएको छ। मासु उत्पादन वार्षिक ४ लाख ३० हजार मेट्रिक टन रहेको छ, जसअनुसार प्रत्येक नेपालीका लागि प्रतिवर्ष २१ केजी उपलब्ध भइरहेको छ। अण्डा उत्पादन १ अर्ब ६० करोडभन्दा बढी रहेको छ, जसअनुसार प्रत्येक नेपालीले प्रतिवर्ष ५५ अण्डा उपभोग गर्न सक्ने अवस्था रहेको छ।
डा. दाहालले अब पशुजन्य उत्पादनको निर्यातलाई प्राथमिकता दिइने बताउँदै चीनमा मासु निर्यातको तयारी भइरहेको जानकारी दिए। उनले कृत्रिम गर्भाधान प्रविधि, सिमेन उत्पादन, लिक्विड नाइट्रोजन उत्पादन, ६ करोड माछाका भुरा उत्पादन, खोप निर्माण, प्रयोगशाला सुधार, र पशुपन्छी औषधि व्यवस्थापनमा भएका सुधारबारे जानकारी गराए।
फार्मेसी सञ्चालनका लागि व्यवसायीहरूले लिने परीक्षामा असफलताको कारण पहिचान गरी समयसापेक्ष तालिम कार्यक्रम आवश्यक रहेकोमा उनले जोड दिए।
उनले च्याङ्ग्रा व्यवस्थापन तथा आनुवंशिक स्रोत प्रवर्द्धनमा समेत ध्यान दिनुपर्ने आवश्यकता औंल्याए। साथै, यी उपलब्धिहरू आफ्नै पहलमा मात्र नभई विभागका सम्पूर्ण कर्मचारीहरूको समर्पणको परिणाम भएको बताए।
डा. दाहालले प्रस्तुत गरेका कार्यकालका उपलब्धि र पशुपन्छी क्षेत्रको वर्तमान अवस्थाबारे विस्तृत विवरण भेट टाइम्स मासिकको आगामी अंकमा प्रकाशन गरिनेछ।
