काठमाडौं।कृषि तथा पशुपन्छी विकासमन्त्री रामनाथ अधिकारीले मन्त्रालय किसानकै पक्षमा काम गरिरहेको बताउनुभएको छ। युवा किसान सञ्जालले आज काठमाडौंमा आयोजना गरेको किसान सम्मान एवं अन्तरक्रिया कार्यक्रममा मन्त्री अधिकारीले आफूले मन्त्रालयको नेतृत्व सम्हालेको आठ महिनाको अवधिमा भएका कार्य र निर्णयहरू समग्र कृषि र किसानको पक्षमा भएको बताउनुभयो। साथै, अझै थुप्रै काम गर्न बाँकी रहेको र त्यसको सकारात्मक प्रतिफल देखिँदै जाने उल्लेख गर्नुभयो।

मन्त्री अधिकारीका अनुसार कृषि ऐन चाँडै अघि बढाउने गरी मन्त्रालयले काम गरिरहेको छ। कृषि मार्फत हामीले चाहेको समृद्धि नयाँ ऐनमार्फत प्राप्त हुन सक्ने गरी ऐन तयार हुँदैछ। मन्त्री अधिकारीले भन्नुभयो, “ऐन चाँडै मन्त्रिपरिषद् हुँदै संसदमा प्रवेश गर्दैछ।”

उहाँले कृषि मार्फत गरिबी घटाउँदै कम्तीमा आफ्नै हैसियतमा बाँच्न सक्ने अवस्थामा पुर्याउने लक्ष्य उक्त ऐनले बोकेको बताउनुभयो। किसानलाई परिचयपत्र वितरणको कार्य यसै वर्षदेखि सुरु गर्ने जानकारी दिँदै प्रधानमन्त्रीबाट यसको सुरुवात गर्ने तयारी भइरहेको उहाँले बताउनुभयो।

मन्त्री अधिकारीका अनुसार कृषि मन्त्रालयमार्फत विगत पाँच वर्षमा अनुदान लिएका व्यक्तिहरूको नाम सार्वजनिक गरिएको छ। कृषि तथा किसानको नाममा १ खर्ब ७ अर्ब रुपैयाँ वितरण भएको र यसको उपलब्धि खोज्ने काम भइरहेको जानकारी दिनुभयो।

मन्त्री अधिकारीले सिंहदरवार चारेर अनुदान लिने विगतको प्रवृत्तिको अन्त्य भइसकेको उल्लेख गर्दै आफू मन्त्रालयको नेतृत्वमा रहुन्जेल अनुदानको दुरुपयोग हुन नदिने प्रतिबद्धता व्यक्त गर्नुभयो। किसानहरूले समयमा मल र बीउ नपाउने गुनासो आउने गरेको विषयमा उहाँले रासायनिक मलमा ठूलो रकम अनुदान गएको र यसको सहज वितरणमा प्रदेश तथा स्थानीय तहको पनि महत्वपूर्ण भूमिका रहने बताउनुभयो।