कैलाली : कैलालीको कैलारी गाउँपालिका–५ गोबरेला निवासी किसान सनोज चौधरीले माछापालन व्यवसायबाट एक याममै रु दुई लाख ५० हजार बचत गर्दै आउनुभएको छ।

करिब दश कट्ठा क्षेत्रफलमा व्यावसायिक रूपमा माछापालन गर्दै आउनुभएका उहाँले एक याममा करिब रु १३ लाख बराबरको माछा बिक्री हुने जानकारी दिनुभयो। उहाँका अनुसार सबै खर्च कटाएर रु दुई लाख ५० हजार बचत हुन्छ।

खेतीकिसानीसँगै केही नयाँ काम गरौँ भन्ने योजनाले माछापालन व्यवसाय सुरु गरेको चौधरीले बताउनुभयो। “व्यवसायको सुरुवातमा कामको कुनै अनुभव थिएन। व्यवसायमा नयाँ भएकाले सुरुका वर्षमा पोखरीमा माछा मरेर क्षति व्यहोर्नुपरेको थियो,” उहाँले भन्नुभयो, “पछि विस्तारै अनुभव बटुल्दै गएपछि अहिले मनग्य आम्दानी हुन थालेको छ, जीविकोपार्जनका लागि कुनै समस्या छैन।”

चौधरीका अनुसार हाल पोखरीमा पङ्गासियस, कमन कार्प, ग्रास र रोहु जातका माछा छन्। माछा होलसेलमा प्रतिकिलो रु २५० र फुटकरमा प्रतिकिलो रु ३०० मा बिक्री हुने उहाँले जानकारी दिनुभयो।

माछा बिक्रीका लागि बजारको समस्या नभए पनि अवैध रूपमा भारतीय माछा भित्रिने गरेकाले बिक्री दरमा वृद्धि हुन नसकेको चौधरीले गुनासो गर्नुभयो। भारतबाट आयात भएका माछा होलसेलमा प्रतिकिलो रु २२० र फुटकरमा प्रतिकिलो रु २८० मा बिक्री हुने भएकाले स्थानीय उत्पादनको बिक्रीमा केही कठिनाइ हुने उहाँको अनुभव छ।

उत्पादित माछा धनगढी, टीकापुर तथा केही स्थानीय बजारमा बिक्री हुने चौधरीले बताउनुभयो। माछापालनका लागि सुरुमा पोखरी निर्माण गर्दा भेटेरिनरी अस्पताल तथा पशुसेवा विज्ञ केन्द्रबाट प्रतिकट्ठा रु १० हजारका दरले कुल रु एक लाख तथा कैलारी गाउँपालिकाबाट रु ५० हजार बराबरको बोरिङसहित पानी तान्ने मोटर र जाल अनुदानमा प्राप्त भएपछि व्यवसाय सञ्चालनमा सहज भएको उहाँले जानकारी दिनुभयो।

पछिल्लो समय भेटेरिनरी अस्पताल तथा पशुसेवा विज्ञ केन्द्र तथा स्थानीय सरकारले व्यावसायिक कृषिमा आबद्ध हुन चाहने किसानलाई अनुदान सहयोग गर्न थालेपछि गोबरेलामा व्यावसायिक रूपमा माछापालन गर्ने किसानको सङ्ख्या बढ्दै गएको केन्द्रले जनाएको छ।