काठमाडौं। नेपालमा पशुपन्छीको ओसारपसारका लागि आवश्यक भेटेरिनरी प्रमाणपत्रको दुरुपयोगबारे भेट टाइम्सले पटक–पटक समाचार प्रकाशन गर्दै नेपाल पशु चिकित्सा परिषद्को ध्यानाकर्षण गराउँदै आएको छ।

नेपाल पशु चिकित्सा परिषद्ले आफ्ना दर्तावाल पशु चिकित्सक डा. टिकाराम न्यौपाने (दर्ता नं. २३३) ले आचार संहिताविपरीत कार्य गरेको पाइएकाले परिषद् नियमावली, २०५६ को नियम २१ (१) बमोजिम फागुन २१ गतेदेखि दुई महिनाका लागि निलम्बन गरेको थियो। निलम्बनको अवधिमा उनलाई कुनै पनि प्रकारको पशु चिकित्सा व्यवसाय सञ्चालन गर्न अयोग्य घोषित गरिएको थियो।

तर, निलम्बनको अवज्ञा गर्दै उनले हिजो, २०८१ चैत्र १९ गते लक्ष्मी चौपाया सप्लायर्स, हेटौंडा मकवानपुरबाट हेमादेवी सप्लायर्स, महोत्तरीका लागि १३ गाई र ३ वटा बाच्छी ढुवानीका लागि पुनः भेटेरिनरी प्रमाणपत्र जारी गरेका छन्।

पशु सेवा कार्यालय, मकवानपुरले हेटौडाको रातमाटे नजिकै ढुवानी भइरहेको ट्रकलाई नियन्त्रणमा लिएर जाँच गर्दा पशुहरू रोगी रहेको, एउटा गाई मर्ने अवस्थामा रहेको पाइएको छ। कार्यालयका प्रमुख डा. ब्रज किशोर ठाकुरका अनुसार निलम्बन गरिएका पशु चिकित्सकले नै क्यारेन्टाइन प्रमाणपत्र जारी गरेको पुष्टि भएपछि कारबाहीका लागि नेपाल पशु चिकित्सा परिषद्मा पत्राचार गरिएको छ।

उनका अनुसार ढुवानीका क्रममा चालक, सहचालक र चरुवालाई प्रहरी कार्यालयमा बुझाइएको छ भने उनीहरूलाई ५,००० रुपैयाँ जरिवाना तिराइएको छ। साथै, गौडाकोटबाट गाईहरू ल्याइएका भए पनि बिल–बिजक हेटौंडाबाट जारी गरिएको पाइएको छ।

यस विषयमा जानकारी लिन पशु चिकित्सक डा. टिकाराम न्यौपानेलाई सम्पर्क गर्दा उनले फोन उठाएनन्। नेपाल पशु चिकित्सा परिषद्का रजिस्ट्रार डा. राम कुमार मण्डलका अनुसार परिषद्को निर्देशन अवज्ञा गरेको प्रमाणित भएमा पशु चिकित्सा परिषद् ऐनअनुसार थप कारबाही हुन सक्ने, अदालतमा मुद्दा दर्ता हुन सक्ने, जरिवाना लाग्न सक्ने तथा अन्ततः उनको दर्ता प्रमाणपत्र नै खारेज हुन सक्ने बताएका छन्।

डा. न्यौपानेले परिषद्को निर्देशनको अवज्ञा गर्दै पशु चिकित्सकीय कार्य निरन्तर गरिरहेको खुलासा भएको छ। निलम्बनको तेस्रो दिन अर्थात् फागुन २३ गते उनले रामचन्द्र पोखरेलको भैंसी चितवनबाट गोरखा लैजानका लागि भेटेरिनरी प्रमाणपत्र जारी गरेका थिए। त्यसैगरी, फागुन २६ गते प्रतिष्ठा मत्स्य फर्म, चितवनबाट काठमाडौंमा माछा पठाउन अर्को भेटेरिनरी प्रमाणपत्र जारी गरेको भेट टाइम्सले पत्ता लगाएको थियो।