काठमाडौं ।छाडा पशुहरूको लागि आश्रय दिँदै आएको स्नेहाज केयर गम्भीर आर्थिक संकटमा परेको छ। १७० सामुदायिक कुकुर र ५० भन्दा बढी फार्म जनावरहरूलाई आश्रय दिँदै आएको यो संस्था आर्थिक अभावका कारण बन्द हुने अवस्थामा पुगेको हो।

स्नेहाज केयरले आज एक अपिल जारी गर्दै संस्था बन्द हुन सक्ने जोखिम रहेको जनाएको छ। अपिलमा भनिएको छ, “स्नेहाज केयर १७० सामुदायिक कुकुर र ५० भन्दा बढी फार्म जनावरहरू का लागि एकमात्र सुरक्षित आश्रय हो। तर, गम्भीर आर्थिक अभावका कारण हामी सधैंको लागि बन्द हुन सक्ने खतरामा छौं। यदि यस्तो भयो भने, यी निर्दोष जनावरहरू पुनः सडकमा अलपत्र पर्नेछन्। हामी कुनै हालतमा यो हुन दिन सक्दैनौं।”

स्नेहाज केयरले छाडा पशुहरूको उद्धार, उपचार र हेरचाह गर्दै आएको छ। संस्थाले जनावरहरूलाई खाना, वासस्थान र आवश्यक चिकित्सा सेवा उपलब्ध गराउँदै आएको छ। तर, आर्थिक अभावका कारण संस्थाले जनावरहरूको हेरचाह गर्न कठिनाइ भइरहेको छ।

संस्थाले जनावरहरूको भविष्य सुरक्षित राख्नको लागि सबैलाई सहयोगको लागि अपिल गरेको छ। “यस दुखद परिस्थितिलाई रोक्नका लागि, हामीलाई तपाईंको सहयोगको अत्यन्त आवश्यकता छ। सानो सहयोगले पनि ठूलो परिवर्तन ल्याउन सक्छ। कृपया आजै सहयोग गर्नुहोस् र हाम्रो अभियानलाई निरन्तरता दिन मद्दत गर्नुहोस्,” अपिलमा भनिएको छ।

स्नेहाज केयरको यो अवस्थाले छाडा पशुहरूको संरक्षणमा चुनौती थपिएको छ। संस्था बन्द भएमा सयौं जनावरहरू सडकमा अलपत्र पर्नेछन्। त्यसैले, पशु अधिकारकर्मीहरूले सरकार र सरोकारवाला निकायहरूलाई यस विषयमा ध्यान दिन आग्रह गरेका छन्।