काठमाडौं। नेपाल भेटेरिनरी एशोसिएसनले काठमाडौंको तीनकुनेमा भएको राजावादीहरूको प्रदर्शनको क्रममा डा. महेश ठाकुरद्वारा सञ्चालित सिटी भेटेरिनरी अस्पतालमा भएको आक्रमणको घोर भर्त्सना गरेको छ। एशोसिएसनले विज्ञप्ति जारी गर्दै आक्रमणमा संलग्न दोषीमाथि कारबाहीको माग गरेको छ।

शुक्रबार भएको प्रदर्शनको क्रममा प्रदर्शनकारीहरूले अस्पतालमा तोडफोड गर्दा उपचारमा संलग्न पशु चिकित्सक डा. आयुष कुमार ठाकुर र डा. विवेक यादव घाइते भएका थिए भने अस्पतालमा लाखौंको क्षति भएको छ।

एशोसिएसनका अध्यक्ष डा. रामकृष्ण खतिवडा र महासचिव डा. केदार सुवेदीद्वारा जारी विज्ञप्तिमा पशु चिकित्सा सेवा आवश्यक सेवा अन्तर्गत पर्ने सेवामूलक पेशा भएको र यसमा बोल्न नसक्ने निर्दोष पशुहरूको स्वास्थ्य र कल्याणका लागि पशु चिकित्सकहरू अहोरात्र खटिरहेको उल्लेख छ। विज्ञप्तिमा पशु चिकित्सकमाथि हुने यस्ता हिंसा र दुव्र्यवहार एशोसिएसनलाई कदापि स्वीकार्य नहुने जनाइएको छ।

एशोसिएसनले पशु चिकित्सक तथा स्वास्थ्य संस्थाहरूमाथि हुने यस्ता हिंसात्मक गतिविधिहरूको घोर भर्त्सना गर्दै पशु स्वास्थ्य सेवा क्षेत्रमा कार्यरत चिकित्सकहरूको सुरक्षा र गरिमा रक्षा गर्न सम्बन्धित निकायहरूलाई यथाशीघ्र उचित कदम चाल्न आग्रह गरेको छ।

यस घटनाको छानबिन गरी दोषीमाथि कानुनअनुसार कडा कारबाहीको साथै पीडित चिकित्सकहरू तथा सो अस्पताललाई उचित क्षतिपूर्तिको व्यवस्था गर्न एशोसिएसनले जोडदार माग गरेको छ। विज्ञप्तिमा पशु चिकित्सकहरूलाई आफ्नो कार्य थलोमा हिंसा गरेर त्रसित पार्ने कार्यले समग्र पशु चिकित्सा क्षेत्रमा नकारात्मक असर पार्ने भन्दै एशोसिएसनले यस किसिमका घटनाहरू प्रति आवश्यक कानुनी तथा संस्थागत पहल गर्न प्रतिवद्ध रहेको जनाएको छ।