पर्सागढीमा म्याद गुज्रिएको औषधि वितरणको आरोप, विज्ञ केन्द्र भन्छ– राजनीति भयो
काठमाडौं ।पर्सागढी नगरपालिकामा पशुहरूका लागि म्याद गुज्रिएको औषधि वितरण गरिएको आरोप सामाजिक सञ्जालमा व्यापक रूपमा फैलिएको छ। भेटेरिनरी अस्पताल तथा पशु सेवा विज्ञ केन्द्र पर्साले वितरण गरेको औषधि म्याद गुज्रिएको हुनसक्ने आशंका गर्दै स्थानीय किसानहरूले चिन्ता व्यक्त गरेका छन्।
तर, भेटेरिनरी अस्पताल तथा पशु सेवा विज्ञ केन्द्रका प्रमुख डा. राजकुमार साहले यो घटनालाई अनावश्यक रूपमा राजनीतिकरण गरिएको दाबी गरेका छन्।
खोप कार्यक्रममा अनुगमन टोली
पर्सागढी नगरपालिकाका पशु सेवा प्रमुख डा. पुष्पेन्द्र शाहका अनुसार नगरपालिकाले नियमित रूपमा पशुहरूका लागि खोप कार्यक्रम सञ्चालन गरिरहेको थियो। सोही क्रममा भेटेरिनरी अस्पताल तथा पशु सेवा विज्ञ केन्द्रका प्रमुख डा. राजकुमार साहको नेतृत्वमा अनुगमन टोलीले औषधि वितरण गरेको थियो।
“नगरपालिकाले औषधि वितरण गरेको भन्ने हल्ला गलत हो। अनुगमन टोलीले नाम्ले जुकाको औषधि र लिभरटोनिक वितरण गरेको थियो, जसको उपभोग्य मिति मार्च २०२५ सम्म थियो,” डा. शाहले स्पष्ट पारे। “विज्ञ केन्द्रले औषधि वितरण किन गर्यो भन्ने मलाई थाहा छैन। तर, अनावश्यक रूपमा मेरो नाम जोडेर विवाद सिर्जना गरियो।”
डा. साहको बचाउ: ‘राजनीतिक मुद्दा बनाइयो’
भेटेरिनरी अस्पताल तथा पशु सेवा विज्ञ केन्द्र पर्साका प्रमुख डा. राजकुमार साहले औषधि वितरणलाई गलत रूपमा व्याख्या गरिएको बताए। उनले जनमत पार्टीले यस विषयलाई राजनीतिक मुद्दा बनाएर अनावश्यक विवाद सिर्जना गरेको आरोप लगाए।
“हामीले किसानलाई बाँड्नकै लागि औषधि खरिद गरेका हौं। खोप कार्यक्रम भइरहेको ठाउँमा किसानलाई राहत दिन औषधि वितरण गरेका थियौं,” उनले भने। “एउटा बाख्राले कति दिनसम्म औषधि खानुपर्छ भन्ने कुरा कम्पनीले निर्धारण गर्छ। हामीले सोहीअनुसार औषधि बाँडेका थियौं।”
डा. साहका अनुसार मार्च २०२५ भनेको सोही महिनाभित्र प्रयोग गर्न मिल्ने समयसीमा हो। उनले औषधि म्याद गुज्रिन लागेको भनेर अनावश्यक हल्ला फैलाइएको दाबी गरे।
“हाम्रो कार्यालयको स्वीकृत बजेटअनुसार खरिद गरिएको औषधि नष्ट गर्नुभन्दा प्रयोग गर्न मिल्ने अवधिभित्रै वितरण गरिएको हो,” उनले थपे।
प्रकाशित समाचारको तस्वीरमा त्रुटि परेकाले सच्याइएको छ। – सम्पादक
