तनहुँ। तनहुँको देवघाट गाउँपालिका र भेटेरिनरी अस्पताल तथा पशु सेवा विज्ञ केन्द्रको आयोजनामा तीन दिने सामुदायिक तथा घरपालुवा कुकुरहरूका लागि निःशुल्क बन्ध्याकरण र रेबिज खोप शिविर सम्पन्न भएको छ।

चैत्र ३ गते देवघाट गाउँपालिकामा सञ्चालित शिविरमा ४१ सामुदायिक र २६ घरपालुवा गरी ६७ कुकुरको बन्ध्याकरण गरिएको थियो। त्यस्तै चैत्र ४ र ५ गते भेटेरिनरी अस्पताल तथा पशु सेवा विज्ञ केन्द्रमा सञ्चालित शिविरमा क्रमशः ५३ र ७३ कुकुरको बन्ध्याकरण गरिएको थियो। तीन दिनमा जम्मा १९७ कुकुरको बन्ध्याकरण गरिएको छ। साथै शिविरमा सहभागी सबै कुकुर तथा ३ बिरालोलाई रेबिजविरुद्धको खोप पनि निःशुल्क प्रदान गरिएको थियो।

भेटेरिनरी अस्पताल तथा पशु सेवा विज्ञ केन्द्रका कार्यालय प्रमुख रविनसन अधिकारीका अनुसार, बन्ध्याकरणले कुकुरको अत्यधिक प्रजनन रोक्ने र अनावश्यक कुकुरको सङ्ख्या घटाउने लक्ष्य राखिएको छ। यसबाट सडक दुर्घटना, फोहोर, रोगको फैलावटजस्ता समस्या कम हुने विश्वास लिइएको छ। त्यसैगरी, रेबिजविरुद्धको खोपले कुकुरबाट मानिसमा सर्ने रोगको जोखिम कम गरी मानव स्वास्थ्यको सुरक्षामा मद्दत पुग्ने अपेक्षा गरिएको छ।

शिविरको मुख्य उद्देश्य सामुदायिक तथा घरपालुवा कुकुरको स्वास्थ्य अवस्था सुधार गर्नु, पशु कल्याणमा ध्यान दिनु र मानव स्वास्थ्यको सुरक्षा गर्नु रहेको अधिकारीले बताए।

शिविरमा स्थानीय बासिन्दाको उल्लेख्य सहभागिता रहेको थियो। उनीहरूले यस्तो कार्यक्रम नियमित रूपमा सञ्चालन गर्नुपर्नेमा जोड दिएका छन्।