आज विश्व वन्यजन्तु दिवस मनाइँदै
काठमाडौं । आज मार्च ३, विश्व वन्यजन्तु दिवस, पृथ्वीका वन्यजन्तु तथा मानवको बासस्थानको संरक्षणमा जागरुकता फैलाउन मनाइँदैछ। यस वर्ष “वन्यजन्तु संरक्षणमा वित्तः मानव र पृथ्वीमा लगानी” भन्ने नाराका साथ दिवस मनाइँदैछ, जसले जैविक विविधता, पर्यावरणीय सन्तुलन तथा पारिस्थितिक प्रणालीको महत्त्वलाई उजागर गर्छ।
संयुक्त राष्ट्रसंघको ६८औं महासभाले २०१३ को डिसेम्बर २० मा जोखिममा परेका वन्यजन्तु तथा वनस्पतिबारे सचेतना फैलाउने उद्देश्यले मार्च ३ लाई विश्व वन्यजन्तु दिवसको रूपमा घोषणा गरेको हो। सन् १९७३ मा आजकै दिन लोपोन्मुख वन्यजन्तु तथा वनस्पतिको अन्तर्राष्ट्रिय व्यापार महासन्धि (CITES) अनुमोदन भएको थियो।
त्यसै वर्ष, मार्च ३-१४ सम्म थाइल्याण्डको बैंककमा आयोजित जलवायु परिवर्तनसम्बन्धी १६औं संयुक्त राष्ट्रसंघीय सम्मेलन तथा CITES पक्षराष्ट्रको सम्मेलनले थाइल्याण्डको वन्यजन्तु दिवस मनाउने प्रस्ताव स्वीकृत गर्दै महासभासमक्ष पेश गरेको थियो।
संयुक्त राष्ट्रसंघका अनुसार CITES सचिवालयले विभिन्न अन्तर्राष्ट्रिय निकाय तथा संस्थासँग सहकार्य गर्दै विश्वभर वन्यजन्तु संरक्षणसम्बन्धी परियोजनाहरू कार्यान्वयन गरिरहेको छ। हाल CITES मा १८३ देश सदस्य छन्। वन्यजन्तु तथा वनस्पतिको संरक्षणका लागि ठूलो धनराशि आवश्यक पर्ने देखिएको छ, विशेष गरी एक करोडभन्दा बढी प्रजाति लोप हुने जोखिममा रहेको तथ्यांकले यो विषयलाई गम्भीर रूपमा लिनुपर्ने देखाएको छ।
