काठमाडौं |स्याङ्जा प्रहरीले रेविज सङ्क्रमित मरेका जनावरहरूको अवैध किनबेचमा संलग्न दुई जनालाई पक्राउ गरेको छ। वालिङ नगरपालिका–५ का ५५ वर्षीय राजेन्द्रबहादुर के.सी.ले आफ्ना रेविज सङ्क्रमित जनावरहरू बेचेको आरोपमा पक्राउ परेका छन्। त्यस्तै, ती जनावरहरू खरिद गरी मासुका लागि बजारतर्फ लैजाँदै गरेका वालिङ नगरपालिका–८ का ५० वर्षीय शंसुदिन मियाँलाई पनि नियन्त्रणमा लिइएको छ।

के.सी.ले पालेका एक भैँसी, एक पाडा, एक बाख्रा र एक पाठीमा रेविजको लक्षण देखिएपछि स्थानीय पशु प्राविधिकहरूले उनलाई र छिमेकीहरूलाई सतर्क रहन आग्रह गरेका थिए। तर, के.सी.ले ती जनावरहरू मियाँलाई बेचेका थिए। मियाँले ती मरेका जनावरहरू ग. २ च. २७६० नम्बरको सवारी साधनमा राखी वालिङ बजार हुँदै भीरकोट नगरपालिका बयरघारीतर्फ लैजाँदै गर्दा प्रहरीले पक्राउ गरेको हो।

पक्राउ परेका दुवै जनाविरुद्ध सङ्क्रामक रोग फैलाउन नहुने कसूरमा स्याङ्जा जिल्ला अदालतबाट म्याद थप गरी अनुसन्धान भइरहेको प्रहरीले जनाएको छ। मरेको भैँसीलाई व्यवस्थित रूपमा पुरिएको छ भने अन्य जनावरहरू के.सी.को घरमै फिर्ता पठाइएको छ।यो समाचार गोरखपत्रमा प्रकाशित भयको छ ।