सातौं नेपाल एग्रीटेक एक्स्पो आजदेखि भृकुटीमण्डपमा
काठमाडौँ| सातौं नेपाल एग्रीटेक तथा नेपाल फुड एण्ड बेभरेज इन्टरनेशनल एक्स्पो आजदेखि काठमाडौँको भृकुटीमण्डपमा सुरु भएको छ। आगामी तीन दिनसम्म चल्ने यस एक्स्पोमा नेपालका कृषि उद्यमी, व्यवसायी तथा विदेशी कम्पनीहरूले स्टल राख्नेछन्।
नेपालको कृषि क्षेत्रको समग्र विकासलाई प्रवर्द्धन गर्ने उद्देश्यले आयोजना गरिएको यो एक्स्पो मिडिया स्पेस सोलुसन्स प्रालि, फ्युचरेक्स ट्रेड फेयर्स एन्ड इभेन्ट्स प्रालि तथा एक्जिबिसन एन्ड ट्रेड सर्भिसेस इन्डियाद्वारा संयुक्त रूपमा सञ्चालन गरिएको हो।
प्रधानमन्त्री कृषि आधुनिकीकरण परियोजना प्रमुख प्रवर्द्धक रहेको यस एक्स्पोलाई नेपाल गाउँपालिका राष्ट्रिय महासंघ, नेपाल पोल्ट्री महासंघ, राष्ट्रिय दुग्ध विकास बोर्ड, नेपाल कृषि सहकारी केन्द्रीय संघ लि तथा राष्ट्रिय कृषक समूह महासंघ नेपालले सहयोग गरेका छन्।
यस एक्स्पोमा कृषि प्रविधि, खाद्य प्रशोधन उपकरण, दुग्ध तथा पोल्ट्री उत्पादनका सामग्री, जैविक मल र उन्नत बीउविजनका साथै विभिन्न अन्तर्राष्ट्रिय कम्पनीहरूले नवीनतम कृषि प्रविधिहरू प्रस्तुत गर्नेछन्। आयोजकहरूका अनुसार, तीन दिनसम्म चल्ने एक्स्पोमा हजारौं आगन्तुकहरूको सहभागिता रहने अपेक्षा गरिएको छ।
