काठमाडौं । पहिरोबाट क्षतिग्रस्त पनौती नगरपालिका वडा नं १२मा राजकुमार तिमिल्सिना र मन्दिरा तिमिल्सिनाले सञ्चालन गरेको भैंसी फार्मलाई पशु सेवा विभागले राहत वितरण गरेको छ। गत हप्ताको भारी वर्षापछि पहिरोले भैंसी फार्ममा व्यापक क्षति भएको थियो, जसले गर्दा ४० वटा भैंसीको ज्यान जोखिममा परेको थियो। क्षतीले गर्दा भैसीलाई पानी समेत खुवानउन नसकेर फार्म सञ्चालकले सार्वजनिकरुपमा सहयोगको याचना गरेका थिए जसको समाचार भेटखबर डटकमले समेत प्राथमिकताकासाथ प्रकाशन गरेका थियो ।फार्ममा भएको यस क्षतिको बारेमा जानकारी पश्चात, पशु सेवा विभाग र पनौती नगरपालिकाको समन्वयमा तत्कालै राहत तथा उद्धार कार्य सुरु भएको हो।

राहत कार्य र भैंसी स्थानान्तरण
पनौती नगरपालिकाको सहयोगमा सबै भैंसीहरूलाई पनौती नगरपालिका वडा नं ८ मा रहेको खाली फार्ममा सुरक्षित रूपमा स्थानान्तरण गरिएको छ। भैंसीहरूलाई हाल सुरक्षित ठाउँमा राखिए पनि आहारको प्रमुख समस्या रहेको छ। पहिरो ग्रस्त ठाँउबाट भैंसीहरू भने घाउ वा चोटपटकबिना नै स्थानान्तरण गरिए गरिएको छ।

पशु सेवा विभागद्वारा राहत सामग्री वितरण
पशु सेवा विभागले पनौती नगरपालिकाविपद व्यवस्थापन समितिलाई विभिन्न दानापानी, औषधि, र अन्य सामग्री वितरण गरेको छ। विभागले भैंसीको दाना,भिटामिन तथा मिनरल मिक्स्चर,मेलिक्सिक्याम बोलस,घाउमा लगाउने मलम तथा स्प्रे तथा निसंक्रामक औषधि वितरण गरेको ।

पशु सेवा विभागको टोलीमा डा.आभास पौडेल, डा. नवराज श्रेष्ठ, र हेमराज बोहोराको उपस्थिति थियो भने, पनौती नगरपालिकाबाट पशु सेवा शाखा प्रमुख डा. दिपिका रेग्मी सहतिको टोली खटिएको थियो।

यस्तै,पनौती नगरपालिकाका प्रमुख राम शरण भण्डारीका अनुसार, हालसम्म सम्पूर्ण तथ्यांक संकलन नगरिएको भए पनि करिब २ हजार भन्दा बढी पशुहरूको क्षति भएको प्रारम्भिक अनुमान छ। उनले विपद व्यवस्थापनको लागि सबै सरोकारवाला निकायलाई मिलेर काम गर्न आह्वान गरे।

यस राहत कार्यले पहिरोबाट पीडित बनेका तिमिलसेना परिवारलाई तत्कालै केही राहत पुगे पनि स्थायी समाधानको आवश्यकता रहेको देखिएको छ।